Муниципаль архивларда 1941-1945 еллардагы Бөек Ватан сугышы чорына караган аеруча кыйммәтле документлар ачыкланган
4 июльдә Азнакай һәм Баулы муниципаль районнарында Татарстан Республикасы Архив эше буенча дәүләт комитетының экспертиза-тикшерү һәм методик комиссиясенең муниципаль архивларда саклана торган аеруча кыйммәтле документларны сайлап алу буенча чираттагы күчмә зона утырышлары узды.
20 муниципаль архив җитәкчеләре комиссия каравына 1941-1945 еллардагы Бөек Ватан сугышы чорына караган, шул исәптән Бөек Ватан сугышында катнашучыларның шәхси әйберләре фондыннан 206 документ тәкъдим итте. Ачыкланган материаллар арасында - тылда хезмәт батырлыгының сирәк шаһитлары, фронтовикларның хатлары һәм фотолары, республика районнарына эвакуацияләнгәннәрнең исемлекләре. Әлеге тарихи чыганаклар илебезнең каһарманлы үткәне турында хәтерне саклау өчен аерым кыйммәткә ия. Тәкъдим ителгәннәрдән аеруча кыйммәтле документлар исемлегенә 139 документ кертелде.
Дүрт күчмә зона утырышы нәтиҗәләре буенча аеруча кыйммәтле документлар дип 202 документ танылды, алар махсус исәпкә куелачак һәм махсус саклану режимында торачак.