Татбашархивта «Бөек Ватан сугышы турында Татарстан архивлары» темасына тарихи-агарту укулар үтте

2015 елның 5 маенда Татарстан Республикасы Министрлар Кабинеты каршындагы Баш архив идарәсендә «Бөек Ватан сугышы турында Татарстан архивлары» темасына тарихи-агарту укулар үтте. Чара Җиңүнең 70 еллыгына багышланган иде.
Укуларда Татбашархив җитәкчесе Д.И.Ибраһимов, Россия тарихчы-архивчылар җәмгыяте Татарстан бүлеге идарәсе рәисе, академик И.Р.Таһиров, Татарстан Республикасы Тарихи-сәяси документлар үзәк дәүләт архивы директоры урынбасары Р.Б.Садыйкова, Казан федераль университеты Халыкара мөнәсәбәтләр, тарих һәм Көнчыгышны өйрәнү институты директоры урынбасары Е.Г.Кривоножкина, Татарстан Фәннәр академиясе Ш. Мәрҗани исемендәге Тарих институты Яңа тарих бүлеге мөдире И.К.Заһидуллин, Татарстан Фәннәр академиясе Ш. Мәрҗани исемендәге Тарих институтының әйдәп баручы фәнни хезмәткәре А.Ш.Кәбирова, Бөек Ватан сугышы музее-мемориалы мөдире М.В.Черепанов, “Электронный Архив” Корпорациясенең Татарстан Республикасындагы вәкиллеге җитәкчесе Д.Н.Салихов чыгышлар ясады. Чыгышларда Татарстан архивларының һәм республика документаль мирасының тарих фәненең үсешендә һәм яшьләрне тәрбияләүдә уйнаган роле яктыртылды. Катнашучыларны шулай ук Бөек Ватан сугышы тарихына багышланган проектларда яңа технологияләрнең кулланылуы белән таныштырдылар.
Чара кысаларында Татарстан Республикасы Тарихи-сәяси документлар үзәк дәүләт архивы тарафыннан хәзерләнгән «Көндәлекләрдә һәм истәлекләрдә Бөек Ватан сугышы» документлар җыентыгы презентациясе үтте.
Укулар уңае белән Татарстан Республикасы Аудиовизуаль документлар үзәк дәүләт архивында сакланучы 1941-1945 еллар кинохроникасы күрсәтелде һәм Бөек Ватан сугышындагы Җиңүнең 70 еллыгына багышланган архив документлары күргәзмәсе оештырылды.