ЯҢАЛЫКЛАР

1941-1945 еллардагы Бөек Ватан сугышында Җиңүнең 70 еллыгы уңаеннан “Татарстан Республикасы архив хезмәте” сайтының Татарстан Республикасы Милли архивы сәхифәсенә гаилә архивларында сакланган фронт хатларын, фоторәсемнәрне һәм сугыш чорына караган башка документларны дәүләт сакланышына тапшыру үтенече белән халыкка мөрәҗәгать урнаштырылды.

2015 елның 8 июненнән 11 июненә кадәр Татарстан Республикасы Эш-хезмәт документлары дәүләт архивы тарафыннан 254 мөрәҗәгать кабул ителде. Шәхси рәвештә мөрәҗәгать итүчеләрдән 124 иҗтимагый-хокукый эчтәлекле гариза, Россия Пенсия фонды бүлекләреннән электрон рәвештә 89 мөрәҗәгать кабул ителде. Архив хезмәткәрләре тарафыннан 196 архив белешмәсе әзерләнде.

2015 елның 11 июнендә Татарстан Республикасы Министрлар Кабинеты каршындагы Баш архив идарәсе эксперт-тикшерү һәм методик комиссиясенең чираттагы утырышы узды. Комиссия утырышында дәүләт һәм муниципаль архивларның 105 оешма-чыганакларының эш номенклатуралары һәм документларны хисапка алу исемлекләре каралды. Шулар арасында Татарстан Республикасы Прокуратурасы һәм Татарстан Республикасы Сәламәтлек саклау министрлыгы документлары бар.

Татарстан Республикасы Милли архивы “Россиянең һәм Европаның Петр I чоры ядкарьләре: өйрәнү, саклау, мәдәни туризм” исемле VII Халыкара конгресста катнашты. 2015 елның 5-7 июнендә Санкт-Петербург шәһәрендә узган конгресс Петр I чоры ядкарьләрен өйрәнү, саклау, реставрацияләү һәм мәдәни туризм маршрутларына кертү проблемаларын комплекслы өйрәнүгә багышланган иде.
Форумда Россиянең 30 шәһәреннән һәм 12 чит илдән делегацияләр катнашты. Татарстан Республикасы Милли архивының документларны нәшер итү бүлеге җитәчесе О. В. Федотова “Петр һәм Павел соборы – Казанның Петр I чорындагы төп ядкарьләреннән берсе: үткәне, бүгенгесе, киләчәге” темасына доклад ясады.

2015 елның 6 июнендә «Татарстан – Яңа Гасыр» телевизион каналындагы «Новости Татарстана. В субботу вечером» тапшыруында Татарстан Республикасы Милли архивы катнашында хәзерләнгән сюжет чыкты . Бөек Ватан сугышында Җиңүнең 70 еллыгына багышланган сюжетта якташларыбызның сугыш елларында язган хатлары күрсәтелде һәм укылды. Архивчылар республика халкына фронт хатларын һәм сугыш чорына караган башка документларны дәүләт сакланышына тапшыру үтенече белән халыкка мөрәҗәгать иттеләр.

2015 елның 1 июненнән 5 июненә кадәр Татарстан Республикасы Эш-хезмәт документлары дәүләт архивы тарафыннан 306 мөрәҗәгать кабул ителде. Шәхси рәвештә мөрәҗәгать итүчеләрдән 152 иҗтимагый-хокукый эчтәлекле гариза, Россия Пенсия фонды бүлекләреннән электрон рәвештә 91 мөрәҗәгать кабул ителде. Архив хезмәткәрләре тарафыннан 324 архив белешмәсе әзерләнде.

Татарстан Республикасы Министрлар Кабинеты каршындагы Баш архив идарәсе әйдәүче киңәшчесе С. А. Гоголева Мамадыш муниципаль районы Башкарма комитеты архив бүлегенә командировкага барып кайтты. Татбашархив хезмәткәре архив эше турындагы законнарның үтәлүен, шул исәптән жирле үзидарә органнарына тапшырылган архив эше өлкәсендәге дәүләт вәкаләтләренең үтәлүен тикшерде.

2015 елның 25 маеннан 5 июненә кадәр Казан дәүләт энергетика университетының тарих кафедрасында “Архив белеме” юнәлеше буенча квалификация күтәрү курслары үтте. Курсларда дәүләт һәм муниципаль архивларның 15 хезмәткәре укып чыкты. Тыңлаучыларга архив эшенең үсеше тарихы һәм архивларның хәзерге эшчәнлеге, архив документларын оештыру, архив эшен информатизацияләү, архив эше турындагы законнар һәм электрон документларның саклавын оештыру турында лекцияләр укылды.

Татарстан Республикасы Министрлар Кабинеты каршындагы Баш архив идарәсендә «Альт-Софт» җаваплылыгы чикләнгән җәмгыять (Санкт-Петербург) җитәкчелеге белән видеоконференция узды. Видеоконференциядә Татбашархив җитәкчесе Д. И. Ибраһимов, Татарстан Республикасы Аудиовизуаль документлар үзәк дәүләт архивы директоры С. Н. Горохов, «Альт-Софт» җаваплылыгы чикләнгән җәмгыятe генераль директоры П. А. Гринфельд катнаштылар. Конференциядә Татарстанның архив өлкәсендәге информацион технологияләр үсешендә хезмәттәшлек мәсьәләләре турында фикер алышу булды.

Иске Сәфәр авылы тарихына караган материалларны туплау һәм өйрәнү максаты белән Минзәлә төбәге тарихчысы Р. С. Бәширова Татарстан Республикасы Дәүләт матбугат архивында булды. Ул Калинин районы «Сталин юлыннан» һәм Актаныш районы «Колхоз ударнигы» газеталарының 1930–1950 нче елларда чыккан саннарын өйрәнде.