Бөек Ватан сугышындагы Җиңүнең 71 еллыгына багышланган чаралар кысаларында Татарстан Республикасы Тарихи-сәяси документлар үзәк дәүләт архивы баш белгече Э. Ф. Миңнуллина Казанның 23, 25, 89 нчы урта мәктәпләрендә “Сугышны кичкән сәхифәләр (1941-1945 нче еллар Бөек Ватан сугышы хатлары)” темасына дәресләр үткәрде. Дәресләрдә архив фондларында сакланучы хатлар, сугыш еллары фоторәсемнәре һәм башка документлар кулланылды.

2016 елның 25 апреленнән  29 апреленә кадәр Татарстан Республикасы Эш-хезмәт документлары дәүләт архивы тарафыннан 432 мөрәҗәгать кабул ителде. Шәхси рәвештә мөрәҗәгать итүчеләрдән 186 иҗтимагый-хокукый эчтәлекле гариза, Россия Пенсия фонды бүлекләреннән электрон рәвештә 176 мөрәҗәгать кабул ителде. Архив хезмәткәрләре тарафыннан 314 архив белешмәсе әзерләнде.

Архив эше өлкәсендә Россия Федерациясе һәм Татарстан Республикасы законнарының үтәлүен тикшерү максатыннан Татарстан Республикасы Министрлар Кабинеты каршындагы Баш архив идарәсе “Татмедиа” Республика матбугат һәм массакүләм коммуникацияләр агентлыгында планлы тикшерү үткәрде. Тикшерү нәтиҗәсендә тикшерү акты төзелде. Архив эше турындагы законнарның үтәлүендә бозулар табылмады.

Алдан бирелгән күрсәтмәләрнең үтәлүен күзәтү максатыннан “Казан медицина көллияте” дәүләт автономияле һөнәри белем бирүче учреждениедә планнан тыш тикшерү үткәрелде. Күрсәтмә үтәлмәгән, административ хокук бозу турында протокол төзелде.

2016 елның 28 нче апрелендә Татарстан Республикасы Министрлар Кабинеты каршындагы Баш архив идарәсе эксперт-тикшерү һәм методик комиссиясенең чираттагы утырышы узды. Комиссия утырышында дәүләт һәм муниципаль архивларының 47 оешма-чыганакларының эш номенклатуралары һәм документларны хисапка алу исемлекләре каралды. Алар арасында Татарстан Республикасы Президенты Аппараты, Татарстан Республикасы Мәгариф һәм фән министрлыгы, муниципаль район авыл җирлекләренең Совет һәм Башкарма комитетларының һәм башка оешмаларның материаллары бар.

Татарстан Республикасы Милли архивында Казан дәүләт архитектура-төзелеш университетының «Архитектура мирасын торгызу һәм реставрацияләү» белгечлеген өйрәнүче студентлар өчен дәрес үткәрелде.

Студентлар шәһәр төзелеше буенча аеруча кыйммәтле документлар, шул исәптән, Казандагы биналарның план-сызымнары, шулай ук архивның фәнни-белешмә аппараты белән таныштылар, архив документларын эзләү ысулларын өйрәнделәр. 

2016 елның 21 нче апрелендә Татарстан Республикасы Министрлар Кабинеты каршындагы Баш архив идарәсе коллегиясенең чираттагы утырышы узды. Утырышта Татарстан Республикасы муниципаль районнары һәм шәһәр округлары башкарма комитетларының архив бүлекләре җитәкчеләре катнашты. Җыелышта түбәндәге мәсьәләләр каралды:

1. Татарстан Республикасы архив тармагын информатизацияләү үсеше перспективалары.

2. Дәүләт, муниципаль һәм социаль җәһәттән әһәмиятле хезмәтләрне электрон рәвешкә күчерү буенча чаралар программасын гамәлгә ашыру барышы.

3.  Татарстан Республикасы Милли архивының чыганаклары булган оешмаларның эшчәнлеге мисалында электрон документлар белән эш итүне оештыру ысуллары.

4. Татарстан Республикасының дәүләт милкенә караган архив документларын саклау, туплау, исәпки алу һәм файдалану буенча дәүләт вәкаләтләрен үтәү өчен республика бюджетыннан җирле үзидарә органнарына бүлеп бирелгән субвенцияләрне тоту нәтиҗәлелегенә анализ.